గ్రంథాలయాలు ప్రత్యక్ష దేవాలయాలు – గ్రంథాలయ వారోత్సవాలు ఉత్సాహభరితంగా ప్రారంభం

భద్రాద్రి కొత్తగూడెం: గ్రంథాలయాలు నిజమైన విజ్ఞాన దేవాలయాలని, ఆ దేవాలయాలు మనిషి జీవిత మార్గాన్ని మలచటానికి సహకరించగలవని జిల్లా కలెక్టర్ జితేష్ వి. పాటిల్ పేర్కొన్నారు. గురువారం జిల్లా గ్రంథాలయ సంస్థ ఆధ్వర్యంలో జిల్లా పరిషత్ సమావేశ మందిరంలో జాతీయ గ్రంథాలయ వారోత్సవాలు ఘనంగా ప్రారంభమయ్యాయి. ఈ కార్యక్రమంలో ముఖ్య అతిథిగా పాల్గొన్న కలెక్టర్ జితేష్ వి. పాటిల్, అదనపు కలెక్టర్ విద్యా చందనతో కలిసి జ్యోతి ప్రజ్వలన చేసి సరస్వతి మాత, ఎస్ఆర్ రంగరాజన్, చాచా నెహ్రూ చిత్రపటాలకు పూలమాలలు వేసి నివాళులర్పించారు. ఈ సందర్భంగా కలెక్టర్ మాట్లాడుతూ, “గ్రంథాలయాలు విజ్ఞాన భాండాగారాలు మాత్రమే కాకుండా, పిల్లల్లో జ్ఞానోదయాన్ని వెలికితీసే ప్రత్యక్ష దేవాలయాలవంటి వంటివి. చదువు మరియు పుస్తక పఠనమే జీవితం యొక్క రూపురేఖలను మార్చే ప్రధాన ఆధారాలు,” అని చెప్పారు. వారోత్సవాల్లో భాగంగా వివిధ పాఠశాలల విద్యార్థులు పాల్గొని నృత్య ప్రదర్శనలతో అందరినీ అలరించారు. ఈ ప్రదర్శనలను చూసిన కలెక్టర్ పిల్లల నైపుణ్యాన్ని ప్రశంసిస్తూ వారికి ఆటోగ్రాఫ్ ఇస్తూ, “పుస్తకాలతో స్నేహం చేస్తేనే విజ్ఞానంలో ఉన్నత శిఖరాలను అధిరోహించగలరు,” అంటూ ప్రోత్సహించారు. కార్యక్రమంలో మున్సిపల్ కమిషనర్ శేషాంజన స్వామి, గ్రంథాలయ ఆఫీస్ ఇంచార్జ్ ఎం. నవీన్ కుమార్, గ్రంథపాలకురాలు జి. మణి మృదుల, జిల్లాలోని గ్రంథపాలకులు మధు బాబు, వంశీ, జానీ, వాణి, రుక్మిణి, గీత తదితరులు పాల్గొన్నారు. కలెక్టర్ సందేశం: “చదువుల ద్వారా వ్యక్తిత్వ వికాసం జరగాలని, ప్రతీ విద్యార్థిలోని సృజనాత్మక శక్తిని వెలికి తీయాలని, గ్రంథాలయాల ద్వారా పిల్లలకు చదువు విలువను నేర్పడం మహత్తర కార్యమని,” కలెక్టర్ జితేష్ వి. పాటిల్ అభిప్రాయపడ్డారు.