పేదలలో అత్యంత పేదలకు మాత్రమే డబుల్ బెడ్ రూమ్ ఇల్లు: కలెక్టర్ జితేష్ వి. పాటిల్
పేదలలో అత్యంత నిరుపేదలకు మాత్రమే డబుల్ బెడ్ రూమ్ ఇల్లు మంజూరు అవ్వాలని భద్రాద్రి కొత్తగూడెం జిల్లా కలెక్టర్ జితేష్ వి. పాటిల్ స్పష్టం చేశారు. శుక్రవారం టెలికాన్ఫరెన్స్ ద్వారా ఆర్డీవోలు, జిల్లా అధికారులు, తాసిల్దారులతో సమావేశం నిర్వహించిన సందర్భంగా ఈ వ్యాఖ్యలు చేశారు. డబుల్ బెడ్ రూమ్ ఇళ్ల లబ్ధిదారుల ఎంపిక, సమగ్ర కుటుంబ సర్వే డేటా ఎంట్రీ, జిల్లాలో భూ సమస్యలపై సమీక్ష నిర్వహించారు.
ఈ సందర్భంగా కలెక్టర్ మాట్లాడుతూ సమగ్ర ఇంటింటి కుటుంబ సర్వే డేటా ఎంట్రీను వేగవంతంగా పూర్తి చేయాలని ఆదేశించారు. కొత్తగూడెం, లక్ష్మీదేవిపల్లి, పాల్వంచ, అశ్వరావుపేట, చర్ల మండలాల్లో డేటా ఎంట్రీ పురోగతిపై అసంతృప్తి వ్యక్తం చేశారు. కరకగూడెం, చర్ల మండలాలు అతి దూర ప్రాంతాల్లో ఉండటం, నెట్వర్క్ సమస్యలు, విద్యుత్ అంతరాయాలు, మరియు డేటా ఎంట్రీ ఆపరేటర్లు కొరత వంటి సవాళ్లను దృష్టిలో ఉంచుకుని, మొదటగా బూర్గంపాడు మండలంలో డేటా ఎంట్రీ ప్రక్రియ పూర్తి చేసి తర్వాత కరకగూడెం, చర్ల మండలాల్లో డేటా ఎంట్రీ ప్రారంభించాలన్నారు.
లబ్ధిదారుల ఎంపికకు పారదర్శక విధానం
డబుల్ బెడ్ రూమ్ ఇళ్లకు లబ్ధిదారుల ఎంపికలో తాసిల్దారులు క్షేత్రస్థాయిలో పర్యటించి, పేదలలో అత్యంత నిరుపేదలుగా గుర్తింపునకు అర్హులైన వారికి మాత్రమే లబ్ధి చేకూరేలా చర్యలు తీసుకోవాలని సూచించారు. పిల్లలతో జీవనం సాగిస్తున్న ఒంటరి మహిళలు, వితంతువులు, గుడిసెల్లో నివసిస్తున్న పేదలను గుర్తించి నివేదికలు సమర్పించాలని ఆదేశించారు. తాసిల్దారులు ఇచ్చిన నివేదికలను ఆర్డీవోలు పునఃపరిశీలన చేసి తుది జాబితా సిద్ధం చేయాలని తెలిపారు.
అక్రమాలకు స్థానం లేదు
లబ్ధిదారుల ఎంపికలో ఎటువంటి పైరవీలు, అవకతవకలు జరుగకుండా పర్యవేక్షణ చేపట్టాలని స్పష్టం చేశారు. లెక్కచేసే అవకాశం ఉండదు అని హెచ్చరికలు జారీ చేశారు.
భూ సమస్యల పరిష్కారం
జిల్లాలో భూసంబంధిత సమస్యలను పరిష్కరించేందుకు చర్యలు తీసుకుంటామని కలెక్టర్ తెలిపారు. గిరిజనేతరులకు విభజన పేరుతో భూమి అమ్మకానికి అధికారులు సహకరిస్తే, వారిపై క్రమశిక్షణ చర్యలు తీసుకుంటామని, అవసరమైతే సస్పెండ్ చేస్తామని హెచ్చరించారు.
ఈ చర్యలతో ప్రభుత్వం అందించే పథకాలు నిజంగా అర్హులైన వారికి అందుతాయని కలెక్టర్ విశ్వాసం వ్యక్తం చేశారు.